Testing testing
Þetta blogg er skrifað til þess að athuga hvort að einhverjir villast ennþá inn á þessa síðu.
Góðar stundir og áfram United.

Hæ!
Ásgeir í Tölvulistanum hérna.

Vökumet!
Eins og áður hefur komið fram á þessu ömurlega bloggi þá blogga ég ekki oft. Nú tel ég hins vegar ærið tilefni til bloggs.
Þannig er nefnilega mál með vexti að ég hef tapað geðheilsunni.
Minn ágæti félagi Stiftamtmaðurinn hringdi í mig í dag um fjögurleytið (ég á við klukkan 1600 í gær) og tilkynnti mér það að hann hefði verið að uppgötva að við ættum að skila 30% heimaprófi klukkan 0800 morguninn eftir (sem sagt fyrir hálftíma síðan). Þetta kom mér vissulega í opna skjöldu en vakti engu að síður kátínu mína (mér er ekki hlátur í huga lengur). Heimprófið hófst sem sagt daginn áður þ.e. þann 17. þessa mánaðar en við höfðum ekki hugmynd um það og í staðinn fyrir að vera að vinna í að svara prófspurningunum þá horfði Stiftið á videó og svaf allan daginn en ég svaf og var úti að smíða pall og eitthvað rugl.
Þetta er að verða mjög skemmtileg saga já já. Sem sagt blablabla - löng saga stutt. Nú er ég sem sagt búinn að vera vakandi í tæpa 30 klukkutíma og ég held að það sé bara persónulegt met. Ég veit að ég kemst ekki með hælana þar sem Stiftið og Hagnaðið hafa hælana, ég kemst ekki einu sinni með tærnar þar sem þeir hafa hælana - þeir settu eitthvað ógurlegt vökumet fyrir mörgum árum þegar menn fylgdust af kapp með NBA úrslitakeppnum, gott ef að San Antonio hafa ekki orðið meistarar. Fókus - löng saga stutt.
Ég er sem sagt búinn að skila heimaprófinu núna en er búinn að tapa geðheilsunni og er eiginlega orðinn veikur líka (Gústa-style). Þetta getur ekki talist góður undirbúningur undir KSÍ-hófið sem fram fer í kvöld (á eftir). Ég er þess vegna farinn að sofa.
Góða nótt???

Boogie Boogie

Nei nei hér. Hvað gengur eiginlega á???
Eins og glöggir lesendur hafa tekið eftir þá blogga ég ekki hér á þessa síðu nema tilefnið sé ærið. Þannig er mál með vexti að ég sit hér við tölvuna í vinnunni og stytti mér stundir með því að hlusta á Gettu betur í útvarpinu. Sigmar kynnir til sögunnar skemmtiatriði frá MS og hvað gerist? Jú, einhverjir drengir hefja upp raust sína og byrja að kyrja Sveittra Gangavarða slagarann Boogie Boogie.
Maður hlýtur að spyrja sig, eru þessir menn að stela þessu, eigna sér heiðurinn af laginu eða er þetta orðið einhvers konar opinber söngur MS-inga. Lagið er náttúrulega klassískt en það er ekki hægt að segja að þessir ungu drengir hafi "gert það að sínu" eða betrumbætt upphaflegu útgáfuna.
Maður hlýtur líka að spyrja sig hvort að Sveittir hafi nú endanlega misst af lestinni með að gefa út plötu með sínu frábæra efni og aðrir aðilar ætli að vera fyrri til og stela efninu þeirra. Ég veit að Stiftamtmannssólskinsfíflið hefur lengi verið helsti áhugamaður og hvatamaður að því að Sveittir taki sig saman í andlitinu og geri eitthvað í sínum málum og þykist ég vita að Stifti vilji eitthvað tjá sig um þennan atburð.

Eins og flestir vita þá er (var??) Andri nokkur Fannar einn af forsprökkum Sveittra Gangavarða. Hann einbeitir sér hins vegar að nýju hlutverki þessa dagana. Þau Linda eignuðust nefnilega dóttur núna á þriðjudaginn 6. mars og ég óska þeim innilega til hamingju með það.
Menn hafa eitthvað verið að velta fyrir sér nafngift á stúlkuna og hefur nöfnum á borð við Bjarnþrúður, Daðey og Viðja verið slengt fram. Ég vil líka benda á eins og ég hef reyndar gert áður að stúlkan deilir afmælisdegi með fótboltatvíburunum Hafþóri og Eyþóri og Arnari og Bjarka. Spurning hvort að ekki væri rétt að taka tillit til þess þegar nafn verður valið; Hafdís, Eydís, Arna eða Björk. Nú eða bara Lofn.

Evróvisíon
Ég vildi bara minna alla saman á að kjósa hann Eika Hauks annað kvöld. Ég tel að um það geti allir sameinast, rauðhærðir jafnt sem aðrir. Ég veit að Eiki treystir sérstaklega á stuðning gamals nemanda síns. Þessi fyrrum nemandi hans dvelur nú flestum stundum á Kleppi þar sem hann styttir sér stundir við ljóða- og sms-skriftir.

Breyttur maður
Ég veit ekki hvað það er en einhvern veginn finnst mér eins og ég sé töluvert eldri í dag en í gær.

Hvílík snilld!!
Ég sit hérna og er að horfa á endursýninguna af leik Íslands og Frakklands frá í kvöld. Og hvílík mögnuð snilld!!! Þetta er bara einhver besta frammistaða sem ég hef nokkru sinni séð. Frábær karakter að koma svona sterkt tilbaka eftir að hafa drullað langt upp á bak á móti Úkraínu í gær.
Gríðarlega ánægður með Loga Geirsson, hann er að koma skemmtilega á óvart. Og Markús líka að koma sterkur inn eftir að Logi meiddist. Og Birkir Ívar - þvílíkur stórleikur. Og Alexander!! og Guðjón Valur!! O.s.frv.!!
Koma svo - og taka bara titilinn!
Nei róum okkur alveg - við munum sennilega tapa síðan fyrir Túnis á miðvikudaginn.